اسلام آباد کی انسدادِ دہشت گردی عدالت نے 4 اکتوبر احتجاج کیس میں بانی پی ٹی آئی کی بہنوں، علیمہ خان اور عظمیٰ خان، کو اشتہاری قرار دے دیا ہے۔ عدالت نے دونوں کے دائمی وارنٹِ گرفتاری بھی جاری کر دیے ہیں۔
یہ فیصلہ انسدادِ دہشت گردی عدالت کے جج طاہر عباس سپرا نے کیس کی سماعت کے دوران سنایا۔ پولیس نے عدالت کو بتایا کہ اشتہاری قرار دینے سے متعلق قانونی کارروائی مکمل کر لی گئی ہے اور اس کی رپورٹ بھی جمع کرا دی گئی ہے۔
رپورٹ کا جائزہ لینے کے بعد عدالت نے علیمہ خان اور عظمیٰ خان کو اشتہاری قرار دیتے ہوئے ان کے دائمی وارنٹِ گرفتاری جاری کیے۔ ساتھ ہی عدالت نے دونوں کی جائیدادوں کی تفصیلات بھی طلب کر لی ہیں۔
یاد رہے کہ علیمہ خان اور عظمیٰ خان کے خلاف 4 اکتوبر کے احتجاج کے سلسلے میں اسلام آباد کے تھانہ کوہسار میں مقدمہ درج ہے، جس کی مزید قانونی کارروائی جاری ہے۔