پاکستان کے معروف گلوکار عاطف اسلم نے پاکستانی اور بھارتی کوک اسٹوڈیو کے درمیان فرق سے متعلق سوال پر ایسا مختصر مگر معنی خیز جواب دیا ہے جس نے مداحوں کی توجہ حاصل کرلی۔
ایک انٹرویو کے دوران عاطف اسلم سے پوچھا گیا کہ پاکستانی کوک اسٹوڈیو کو بھارتی ورژن پر کیا برتری حاصل ہے اور دونوں ممالک میں پیش کی جانے والی موسیقی میں بنیادی فرق کیا ہے۔
سوال سن کر عاطف اسلم نے مسکراتے ہوئے صرف ایک لفظ میں جواب دیا، ’’جادو‘‘۔ ان کا یہ مختصر جواب پاکستانی کوک اسٹوڈیو کی منفرد موسیقی اور انداز کے حوالے سے خاصا دلچسپ قرار دیا جا رہا ہے۔
عاطف اسلم نے وضاحت کرتے ہوئے کہا کہ دونوں ممالک میں اچھی موسیقی اور دھنیں تخلیق کی جاتی ہیں، تاہم ان کے خیال میں پاکستانی موسیقی میں ایک خاص قسم کی خام پن اور اصلیت موجود ہے جو اسے منفرد بناتی ہے۔
گلوکار کے مطابق بھارتی کوک اسٹوڈیو میں موسیقی کے کمرشل پہلو پر نسبتاً زیادہ توجہ دی جاتی ہے، جبکہ پاکستانی کوک اسٹوڈیو میں اصل اور منفرد دھنوں کو زیادہ اہمیت حاصل ہے۔
عاطف اسلم نے بتایا کہ پاکستانی کوک اسٹوڈیو کے ایک گانے کی تیاری میں کئی افراد مل کر کام کرتے ہیں، جس کے نتیجے میں مختلف تخلیقی خیالات اور موسیقی کے انداز ایک ساتھ شامل ہوتے ہیں۔
انہوں نے مزید کہا کہ فنکاروں کو اپنی تخلیقی صلاحیت اور منفرد انداز شامل کرنے کی آزادی بھی حاصل ہوتی ہے، جو گانے کو ایک الگ شناخت دینے میں اہم کردار ادا کرتی ہے۔
عاطف اسلم کے اس ایک لفظی جواب ’’جادو‘‘ نے پاکستانی اور بھارتی موسیقی کے درمیان فرق پر ایک نئی بحث چھیڑ دی ہے، جبکہ ان کے بیان نے پاکستانی کوک اسٹوڈیو کے منفرد انداز اور موسیقی کی اصل روح کو بھی اجاگر کیا ہے۔