فیڈرل بورڈ آف ریونیو (ایف بی آر) نے آئرن اینڈ اسٹیل سیکٹر کے لیے ایک نیا ٹیکس نافذ کر دیا ہے، جس کے بعد اسٹیل مصنوعات کی قیمتوں میں اضافے کا امکان ظاہر کیا جا رہا ہے۔
ایف بی آر کی جانب سے جاری کیے گئے سیلز ٹیکس جنرل آرڈر کے مطابق، اسٹیل انڈسٹری کے منتخب مینوفیکچررز، میلٹرز، ری رولرز اور کمپوزٹ یونٹس پر بجلی کے ہر یونٹ کے استعمال پر 5 روپے سیلز ٹیکس وصول کیا جائے گا۔
اس نئے نظام کے تحت متعلقہ بجلی تقسیم کار کمپنیاں (ڈسکوز) یہ ٹیکس براہِ راست بجلی کے بلوں میں شامل کر کے وصول کریں گی۔
ایف بی آر کے مطابق یہ ٹیکس خاص طور پر ان کمپنیوں پر لاگو ہوگا جو اسکریپ کی درآمد سے متعلق مقررہ شرائط پوری کرتی ہیں۔
حکام کا کہنا ہے کہ اس اقدام کا مقصد اسٹیل سیکٹر میں ٹیکس نظام کو مزید شفاف اور مؤثر بنانا ہے۔ یہ نیا حکم 4 اگست 2026 کے نوٹیفکیشن کے تحت نافذ العمل ہوگا۔
ماہرین کے مطابق، اس فیصلے کے نتیجے میں اسٹیل کی پیداواری لاگت بڑھ سکتی ہے، جس کا اثر مستقبل میں اسٹیل مصنوعات کی قیمتوں پر بھی پڑنے کا امکان ہے۔